काठमाडौं । भूमि व्यवस्था, सहकारी तथा गरिबी निवारण मन्त्रालयले देशभरका मालपोत तथा नापी कार्यालयमा बिचौलियाको प्रवेश निषेध गर्ने निर्णय गरेको छ ।

बुधबार मन्त्री प्रतिभा रावलको निर्देशनमा सचिवस्तरीय निर्णय गर्दै मन्त्रालयले सबै कार्यालयमा परिचय खुल्ने कागजातका आधारमा मात्रै सेवाग्राहीलाई प्रवेश दिन सम्बन्धित निकायलाई निर्देशन दिएको हो ।

मन्त्रालयका अनुसार विभिन्न बहानामा बिचौलियाहरू कार्यालयभित्र प्रवेश गरी महत्त्वपूर्ण कागजात तथा स्रेस्तामा पहुँच बनाइरहेको गुनासो बढेपछि यस्तो कदम चालिएको हो। अबदेखि अनधिकृत व्यक्तिलाई कार्यालयभित्र प्रवेश गर्न नदिने र सरकारी अभिलेखमा पहुँचसमेत रोक लगाइनेछ ।

निर्देशनमा कार्यालयभित्रको भिडभाड नियन्त्रण गर्न, कागजातको सुरक्षा सुनिश्चित गर्न तथा सेवा प्रवाहलाई प्रभावकारी र गुणस्तरीय बनाउन यस्तो व्यवस्था लागू गरिएको उल्लेख छ। साथै, नियम कार्यान्वयन नभएमा सम्बन्धित कार्यालय प्रमुख नै जिम्मेवार हुने चेतावनीसमेत दिइएको छ।

मन्त्रालयले कर्मचारीलाई अनिवार्य रूपमा परिचयपत्र लगाउन, सेवाग्राहीलाई परिचय खुल्ने कागजातका आधारमा मात्र प्रवेश दिन र कार्यालयमा अनावश्यक भीडभाड हुन नदिन आवश्यक व्यवस्था मिलाउन निर्देशन दिएको छ।

यो व्यवस्था लागू भएपछि सेवाग्राहीले आफ्नो निवेदन र आवश्यक कागजात प्रस्तुत गरेर बिचौलियाविनै सहज रूपमा सेवा प्राप्त गर्न सक्ने विश्वास मन्त्रालयले लिएको छ।