काठमाडौं — भगवान् श्रीकृष्णको पूजा आराधना गरी आज देशभर श्रीकृष्ण जन्माष्टमी पर्व मनाइँदै छ ।

ज्ञानयोग, कर्मयोग र भक्तियोगका प्रणेता मानिने भगवान् श्रीकृष्णको जन्म द्वापरयुगमा भाद्रकृष्ण अष्टमीको मध्यरातमा भएकाले यस दिनलाई ‘श्रीकृष्ण जन्माष्टमी’ र रातलाई ‘मोहरात्री’ भनिन्छ।

यस अवसरमा देशभरका कृष्ण मन्दिरमा बिहानैदेखि भक्तजनको घुइँचो लागेको छ। पूजाआजासहित प्रवचन, भजन–कीर्तन, व्रत बस्ने र रातभर जाग्राम बस्ने परम्परा रहेको छ।

पाटन दरबार क्षेत्रको प्रसिद्ध कृष्ण मन्दिरमा बिहानैदेखि मेला लागेको छ भने पशुपति क्षेत्र, वसन्तपुर दरबार क्षेत्रसहित विभिन्न स्थानका कृष्ण मन्दिरमा दर्शनार्थीहरूको भीड लागेको छ।

विभिन्न धार्मिक सङ्घसंस्थाले झाँकीसहित शोभायात्रा र रथयात्रा निकाल्ने परम्परा पनि छ। अष्टमीको मध्यरातमा श्रीकृष्णको जन्म हुने भएकाले भाद्रकृष्ण नवमीका दिन रथयात्रा निकाल्ने गरिएको धर्मशास्त्रविद् एवं नेपाल पञ्चाङ्ग निर्णायक विकास समितिका पूर्वअध्यक्ष प्रा.डा. रामचन्द्र गौतमले जानकारी दिनुभयो।